خبز توست

باحب العيش التوست

العجانة الكهربا بتاعتي بتاخد ثلاثة كبايات دقيق فقط ولذلك وحدة المقادير بتاعتي ثلاثة أكواب
المقادير
ملعقة شاي خميرة فورية ... يذاب في ماء دافيء مع ملعقة سكر
3 أكواب دقيق
ملعقة شاي سكر
1/2 ملعقة شاي ملح
ربع/ ثلث كوب لين بودرة ... أو ملة روب
2 ملعقة طعام زيت
بيضة

================================================

الطريقة
حطي كل الحاجات دي في العجانة وشغليها وإعجني بمية سخنة لحد ما تتكون عجينة طرية
إدهني إيدك بالزيت وطلعي العجينة وغطيها بطبقة رقيقة من الزيت علشان متلزقش
حطيها في طبق غويط وسيبيها تخمر من بالليل
الصبح إعجنيها جامد جداً ... وتفرديها وتلفيها وترجعي تلفيها بالعرض
قسميها في القوالب ... المقدار ده بيعمل قالبين من بتوعي (3*7
إرجعي إعجنيها في إيدك وتلفيها كده قبل ما تحطيها في القالب
وسيبيها تخمر كثير لحد ما تملا القالب
سخني الفرن جامد على أعلى حاجة
حطي القوالب ولمدة خمس دقائق مثلاُ
بعدين وطي الفرن شوية ... يعني متوسط عالي
من رائحة العيش هتعرفي إنتي والعيال وغالباً الجيران أول ما يستوي
******* أول ما تطلعيها رشي وجهها بالمية حماتي بتقول كده، علشان ميبقاش شكلها مجير
هتطلعيه وتقلبيه على أي حاجة مخرمة

=========================================

إكتشفت إن الوصفة دي لطيفة خالص، ممكن تشكليها تطلع عيش فينو، أو برجر بنز، أو بيتزا أو كاليتزا.. حواوشي إسكندراني
وأخيراً ممكن تفرديها بالنشابة وتسويها على البوتاجاز بدل العيش الصاج ... بس هتطلع روحك من الوقفة قبل ما العيال يشبعوا